“Paa..! antaan wak ciek pai ka ngalau laguang di sijunjuang..!, wak pai survey ka ngalau tu mancaliak kalilawa di sinan”..rengek si suluang,
makono jadilah kami barangkek hari satu tanggal 12 Maret kapatang, mulo start pukua 07: lewaik sangenek, dari pasie jambak Kota Padang walau dipinggia no hehehe ( papiko ),taruih maluncua manjapuik kanti si sulung di by pass simpang kampus unand, taruih manjala ka ateh lewat Pasa baru, taruih ka pasa Banda buek ( indak bandar buat doh ), mandaki ka indaruang, babelok belok di sitinjau lauik, alhamdulilah pajalan lai lancar sajo mandaki panorama satu sampai ka lubuak sulasiah, heheh lah dua dati II nan di lalui Kota Padang jo kabupaten Solok.Mulo masuak Kota Solok, babelok ka suok maluncuak ka Silungkang tantu malalui Saok laweh ( heheh indak Saok lawas doh ), di pasa Silungkang baranti cacah mangodak suduik pasa heheh lah taun 2011 lo kini nan pasa Silungkang takah tu juo baru heheh sajak dulu wak acok bulak baliak ka jawa lawaik jalan darek antah ka pilo barubahno .
“bali sapu bali sapu ijuak nan ketek” kecek amai paja,
“bali sapu bali sapu ijuak nan ketek” kecek amai paja,
“pai lah..!” jano wak kale no, heheh ma lo ado di pasa tun karano hari indak balai doh ..
dek sapu ndak basuo di sinan taruih liak maluncua ka arah jakarta hehehe ( jauah bana pangana mah ) dek lamo lambek di jalan tibolah di Muaro kalaban, langsuang ambiak ka kida manuju Sawahlunto ( heheh pada hal tujuan kan ka Sijunjuang tu ), masuak kota Sawah lunto sambia manikmati keindahan alam di sapanjang jalan, ndeh yo taraso bana ancak no ranah bundo ko mah...lah jauah juo bajalan manuju arah ka Talawi, heheh baru takana ka sijunjuang kama lalu yo ? hehehehe tulah kalau ndak batanyo sok tau mako sasuai jo pameo "malu batanyo jalan jalan, tanyo mulu malu maluin.." .
dek sapu ndak basuo di sinan taruih liak maluncua ka arah jakarta hehehe ( jauah bana pangana mah ) dek lamo lambek di jalan tibolah di Muaro kalaban, langsuang ambiak ka kida manuju Sawahlunto ( heheh pada hal tujuan kan ka Sijunjuang tu ), masuak kota Sawah lunto sambia manikmati keindahan alam di sapanjang jalan, ndeh yo taraso bana ancak no ranah bundo ko mah...lah jauah juo bajalan manuju arah ka Talawi, heheh baru takana ka sijunjuang kama lalu yo ? hehehehe tulah kalau ndak batanyo sok tau mako sasuai jo pameo "malu batanyo jalan jalan, tanyo mulu malu maluin.." .
Akhia no baliak liak ka Muaro kalaban, langsuang cigin belok kida , maluncua ka Muaro bodi, belok kida liak di simpang nan ado tugu patuang unggeh antah unggeh apo tu ndak bacaliak bana doh takahno unggeh garudo. mancaliak pamandangan suok kida di sapanjang jalan manuju ka sijunjuang ko mato ndak panek mamandang tapi nan di cari ndak kunjuang basuo maa no “si lansek manih” tu ? heheh kan sijunjuang langsek no manih kecek elly kasim, heheh takahno sadang indak musim lansek kini mah...
Dek lambek lamo di jalan nan baaspal lumayan licin, hanyo ado sabagian ketek jalan nan tapaso si “lupak” ko bapapah masuak lubang bia indak tadayuak pinggang no ..rato rato jalan muluuuuussssssss..lus..luss ( shalut untuak dinas PU di kabupaten sawah lunto jo sijunjuang ).
Dek lamo lambek di jalan paruik lah taraso lapa lo heheh si lupak ko mambelok sae ka kida di tapi jalan baranti di muko lapau nasi makan wak lai…ndak ado nan dapek di caritoan tantang makan di siko doh biaso biaso sae nyeh…nan pantiang paruik lapa lah kanyang, kupi jalang lo sagaleh heheh, die lo silupak ko baliak, manuju tujuan ngalau laguang, ndak bara jauah dari tampaik makan cako belok kida jalan agak ketek ( kalau basalisiah si lupak jo Toyota dina tapaso mainda ka tapi lambek lambek ), jalan baliku liku manurun mananjak panjang masuak ka tangah rimbo rayo sijunjuang.untuak silupak lah diagiah minum kanyang kanyang di padang cako pagi , ndak basobok jo pom bensin doh di jalan hehehe.
Akhiano tibo juo di kanagarian aia angek, joroang apo namo no lupo lo wak hahah nan dicari lah basuo nan di jalang alah sampai, baranti di tapi Ngalau Laguang, pas di tapi jalan jadi ndak paralu bajalan kaki naiak bukik turun lurah doh heheh, adolo rumah urang di dakek “tampaik wisata” tu.
Baa kok ambo agiah tando kutip “..” di tampaik wisata tu , hehe iyo sabana no lokasi ngalau ko cukuik rancak dan dakek dari jalan raya, jadi kandaraan bisa parkir di palataran ngalau ko, ado pulo sumber aia janiah,, sabana janiah bana koah…tampak no dari dalam ngalau mangalir ka lua di tampuang dek sebuah banda dan alah di agiah tembok panampuangan aia bantuakno saroman jo tabek, tapi sayang aia maluncua sajo ka bawah karano pamatang tabek tu lah indak batutuik lai jadi kolam nan di bangun indak baraia hanyo sabagai banda sajo fungsino lai, sayang sangaik di sayangkan biaya nan alah di kaluakan untuak mambangun kolam alias tabek tu percuma sajo ndak ado manfaatnyo.
Masuak ka dalam ngalau hehehh sabana kalam padohal listrik lah di alirkan ka dalam ngalau tun terbukti ado kawek tarantang 3 sapilin, batunggak jo basi tiang sambilan.. tapi sayang di dalam ngalau iyo sabona bakolam bakapincik,..!! dek lampu indak iduik wak cubo manyigi eh baa kecek lampu ka iduik bola neon nan di pasang di petting tingga petting no sajo lai heheh indak ba bola doh ….!
Sampai di siko alah 5 dati II nan di tampuah yaitu kota Padang, kab solok, kota solok, kab sijunjuang, kota sawah lunto.
“Kama arah lai gie ?”
“Ka ngalau indah lai pa ka pikumbuah” jano si sulung..
OK silupak siap maluncua ka pikumbuah, kalau baliak ka solok tantu sangaik jauah ndak mungkin sampai di pikumbuah sabalun magrib…. Heheh takana dulu ado jalan nan malewati stangkai taruih ka batu sangka atau ka pikumbuah juo… heheh ambiak jalan ka stangkai….di caliak kilo meter batusangka 39 Km, pikumbuah 70 Km…
“heheh dakek mah lewaik kaniak” jano urang rumah heheh…
Maluncualah si lupak manuju stangkai, bajalan saumua iduik baru sakali iko manampuah jalan nan iko hehe, saketek jalan sadang di pelokan dek PU bakabuik eh badebu..rato rato jalan rancak juo…lapeh dari sijunjuang, masuak ka lintau buo…ndeh sawah balenggek lenggek manguniang lo tu…tapi ado lo nan masih ijau, padi baru ka tabik…mangkatutuih lari si lupak malalaui jalan licin walau ketek, ndak taraso latiah MK karano di uruik di urang rumah di sampiang kida.. ( weak..! )
Dek lamo lambek di jalan ka sangka jadi no lalu..lah sore sampai di Batusangka, pangana ka mancari aia kawa kopi daun heheh taruih maluncua ka tabek patah salimpauang,,,ndeh ari lah mulo ujan sangik…si lupak lah mulo lo auaih nak minum… di cari pertamina nan basobok pertamini sajo noh…ah bikolah di pikumbuah sen di agiah minum jano ati wak…sampai di piladang, belok langsuang ka suok, manuju pikumbuah, ha…! Ado pom bensin di sabalah suok jalan.. langsuang mancucuak ka pomba bensin tun heheh ado tulisan “ PREMIUM HABIS..! “ ala mak..!, pangaruah Libiya bagolak kah ini ? ( pado hal kecek berita di radio, distribusi BBM untuk sumbar aman, stock BBM di taluak kabuang aman untuak bulan iko kecek boss pertamina di radio RRI padang bebarapa waktu nan liwaik..)
Di caliak isi tangki tingga sagarih lai, kok ngalau nan ka di daki ..heheh akhiano baminunan sen si lupak di pertamini , lai indak bacampua ko pak binsin ko jano wak , aman pak asli ko mah ndak bacampua saketek alah juo doh tapi haragono anam ribu pak , jodih molah pak isianlah agak sagaregen ka dalam.. ( heheh mukasuik no 10 liter ) cukuik untuak mandaki ngalau jo sampai ka baso biko heheh.hanyo kekhawatiran nan indak baalasan sajo nyoh..10 liter tu kan kalau 1: 9 sen minum si lupak lah 90 Km mah hahah lah sampai di padang liak tu hehehe… dasar khawatir sen.
Akhia no mamanjek juo ka ngalau indah pikumbuah, disambuaik dek ujan labek diateh…pamandangan nan indah suok kida indak taparatian laid oh, lah mamapah silupak dek licin takuik silupak taguliciak heheh sampai di bawah langsuang jadi cik ayam..!. sakali duo tacaliak juo ka tapi jalan Nampak nak mudo baduo duo bataduah di dangau dangau nan di buek pemda untuak mamandang ka bawah.. dek ujan mah makono paja tu bataduah di siko padia ce lah…sampai di ateh tampaik parker ndak bara baisi jo oto atau pun onda ( mukasuik no sepeda motor ), si sulung jo kanti no lah naiak ka ateh masuak ngalau mancaliak sample kalilawa, nan apak jo amak no manunggu sen di kadai sambia minum kopi jalang sagaleh…
Sambia manontin tipie.. di lapau tun Nampak lo kajadian gampo jo tsunami di Japang…ndeh sabana mangarikan ombak tsunami ko mah… pado hal Japang adolah Negara nan alah siap mangadoki bencana tsunami tu, masih porak poranda Nampak no, jadi kesimpulan dalam pikiran ambo, indak ado manusia nan bisa malawan kekuatan alam…persiapan persiapan tu hanyo dapek maminimisasi sae nyoh. Alah baikhtiar sarahkanlah nasib ka Nan Maha Kuaso lai.
Hampia magrib kami turun dari ngalau indah pikumbuah manuju ka pasa pikumbuah mancari makan jo musajik, pass sudah makan urang azan di musajik jamiak pikumbuah di muko pasa heheh paruik kanyang sumbayang alah lo , maluncua wak lai manuju Baso….
Luruih lah jalan ka payo kumbuah, diujuang jalan sungai cubadak, mandaki arah ka baso pandakian dama..!, ndak lamo sampai di pasa baso, ndak singgah bagai doh langsuang masuak ka simpang canduang di kubang serang babelok ka suok maisi BBM heheheh di siko lai aman pasokan BBM lai ado binsin minumlah silupak ko kanyang kanyang..
Sasudah maisi minyak maluncua mambalah sanjo ka bukiktinggi, basiansua sajo , malewati koto hilalang, manurun saketek di lundang manyubarangi batang agam mandaki arah ka biaro, maluncua ka koto katiak handak manjalang tanjuang alam jo parik putuih, sampai lah silupak di garegeh, malalui simpang limo, marangkak manuju simpang by pass pass di anak aia babelok ka kida baranti sabanta di ALBA MART, manamui kanti heheh basobok jo da AL..maota sabanta heheh nan loly baru pulang santa ko no liau… jadih molah da taruihlah kami ka padang lai..
Maluncua lo si lupak manuju aua kuniang, taruih ka jambu aia, babelok arah ka padang lua, cigin sae lari silupak manuju padang panjang, manurun di silaiang tibo di lembah anai, mandaki bukik tambun tulang..! hehehe mancogok lah di kandang ampek, kayu tanam ndak bara lamo sampai di sicincin, malam batambah laruik juo, kok mato lah mulo padiah, sampai di buak aluang tapaso baranti manduduik kopi jalang sagalaeh..lai heheh .
Nan mato lah tabulalak baliak di racak sipupak lo liak, manuju katapiang, di fly over ka bandara tu babelok ka kida manuju by pass maantaan kanti si suluang.tapi ado lo nan ganjia Nampak di ateh jambatan layang fly over tu ..heheh rupono malam ko malam minggu mah, heheh banyak anak bujang bujang tangguang nan baranti diateh jambatan layang tun ,, pantang mancaliak jalan luruih.. lah siap siap ka pacu onda alias track gelap pareman bau kunik tun di sinan indak bahelm indak lo pakai pangaman di badan kok tasuliang langsuak sajo koit..!, kama no goah pulisi..kok di padia no sae nak urang tun pacu onda di jalana raya tun, lah sambuah korban nan tadanga, kok indak jaran jaran juo…
Di tinggaan pareman bau kunik tun di ateh jambatan fly over BIM manuju ka pasa baru maantaan kanti si sulung,sampai di rumah ibuk kost no lah mambukaan pintu paga, babaliaklah silupak manuju musajik kebenaran ( kekek biaso wak sabuik musajik kebetulan …! ) rupono lah di tunggu dek abak no di sinan , salapeh maantaan kanti si sulung taruih manuju tangah kota Padang, handak manjalang pinggia kota papiko lo liak.. sampai di papiko pasie jambak alah pukua sangah duo baleh malam…
Pajalanan panjang nan malelahkan, padang, solok, kota solok, sawahlunto, sijunjuang, tanah datar, batu sangka, limo puluah koto, kota payokumbuah, agam, kota bukik tinggi, kota padang panjang, pariaman, itulah 13 ( TIGO BALEH ) dati II nan di tampuah salamo sahari bapeneang..
Sampai di rumah takakah sae lalok sampai pagi…latiah..!
