Pamit

Bismilahirahmanirahim pambukak kato, Assalamualaikum pangiriang salam ,suko ja maaf di pabanyak, disusun jari tangan diangkek ,kok kurang taratik jo majilih sarato lelo dengan tampan nak samo di dalam ampunan.
Kapado niniak dengan mamak sarato angku jo pangulu bila maulana jo tuak angku ,manti pagawai adaik, Nan tuo pambimbiang dunia .
Tuo mudo gadang jo ketek laki laki jo parampuan dilingkuang barih jo balabeh dilingkuang cupak dengan gantang,  dikanduang adat jo pusako bundo kanduang sato didalam dalam imbauan denai juo.
Konon dek diri badan kami  iyo bana bak kato urang bajalan alah sampai di bateh, kok balayia alah sampai di pulau .pajalanan dimuloi Tatkalo maso dahulunyo di tanggal 1 bulan April ditahun 1986, maso masih mudo matah tanago masih namuah, hati nan kareh indak tabedo, indak rajo maulak sambah, pantangan prajurik manulak parintah, disuruah kito pai dilarang denai baranti
Walau diri denai nanko ibaraik sabuah bauik ketek ditangah masin nan gadang, kok ilang indak ka dicari, jiko luluih indak ka di salami, namun samantang pun baitu kalau lakek no dinan bana bafungsi jo bamakna itu nan paralu dalam pangabdian.
di hari sahari nangko alah tibo jangko jo ukatu , sajak samulo manapaki kaki di perusahaan kito nangko sajak calon pagawai saisuak kalo ditahun 1986  di timor timur badan mangabdi mambangun karir jo cito cito ,indak rajo maulak sambah, indak parajurik maulak parintah samiakna wa ata’na aku dengar  dan aku  taat manjalankan parintah atasan, sampai suatu katiko disuruah babaliak ka kampuang kito nanko sakitar tahun 1995 . baragam tugeh jo karajo nan di pikuakan mulo dari manggili gili modem SCPC di Stasiun Bumi , sikola jo baraja, mautak atik LTG jo Trunk Gate way, sampai PCM jo catu daya , mairik kabel jo mambuek data,  laporan jo analisa , sekretariat jo agenda sampai di warroom  maagiah warning jo mangawal itulah tugeh nan di pacik , sampai kutiko kini nangko alah  sampai  di jangko jo ukatu 32 taun  3 bulan, cukuik jangko jo janjian tumah alah tibo di bateh panantian  MPP lah kanamonyo, hari baganti musim batuka, nan mudo kapamacik tungkek estafet alah siap siap balari manaruihkan bangkalai nan kami tinggakan , samantaro nan tuo pamit lai maagiah kesempatan untuak nan mudo nan masih energik sarato gesit lincah bak kijang di rimbo ka maolah perusahaan nan ko manjadi labiah baiak dan maju jaya.
Salamo bagaua jo bakulindan tantu banyak saketek ado nan tasingguang kanaiak talantuang katurun, baiak kapado jajaran kawan jo rekan pagawai sampai ka jajaran pimpinan jo senior leader, kapado pak GM jo kawan kawan Manager bukan nyo denai jalan dek bagageh , kamungkinan bana dunia ko nan alah sampik atau sanak nan sadang tagak di janjang, kapado sanak Rila jo maaf ambo pintak, dan kapado Allah denai mintak ampun
Ari pagi ayam bakukuik ,
Murai bakicau hari siang,
Kok kurang paparan tolonglah tukuak
Kaganti pauleh kasiah jo sayang,
Salamaik bapisah samantaro di P2TEL kita basuo baliak.